.jpg)
Muay Thai (Kickboxing) National tournament (13-17th Sept 2011) kan hmanzawktakah chuanofficial duty-in ka kal ve a, final zawh tukah chuan Andhra Pradesh fighters ho chuan min kil bawr laih a,urdu tawngin titi kan sep vel a, technique leh dàn leh dùn vel min zawt a; hlim leh láwm takin kan nuia; chutiah lai chuan an zînga pakhat (Bronze medalist) chuan Gold medalist pakhat hnenah chuan kan chief guest pakhatin, “Zirna (education) hi a pawimawh ber a ni,” tih a sawi chu a ngaih pawimawhzia a rawn chhâkchhuak a. Keichuan fiamthu titak deuhin, “Engati nge lehkha a zir peih tawh lo em ni?” tiin ka han chhu zui a, ani chuan an rethei lutuka a sikul/college a kai ve theih loh thu chu a sawi ta a, “Chhungkaw chàwmtu ber a ni si a, nilêngin hna a thawk a, tichuan zanriah a ei khamah zàn lam hna thawk turin a feh chuak leh thin a, mutmu pawh tuah tha hman meuh loin zing karah a rawn practice ve leh hram zawk a ni e,” a han tih chuan ka thinlung a khawih hle mai a, ka mittui a luang tep a ni. Tichuan a sawitupa ngei pawh chuan chhuna college a kal a, a haw veleh inthlaka welding shop-a hna thawk tura a chhuah leh nghal thin thu a sawi zui bawk.
Chù titi chuan nasa takin hringnun lamtluâng kan zawhna kawnga hlawhtlinna kan hmuh theih danah hian ngaihtuahna min sèntîr nghal a; ka vanneihzia ka hrechhuaka chù zàn chuan Pathian hnenah fianriala lawmthu sawina hun te ka han nei nghal. Tin, chu thil chuan Zofate nun nâwlpui min ngiahtuahtir leh nghal bawk. He thuziak chhiar pha chin hi chu Mizotawng thiam, Pathian nung betu kan nih ngei ka ring. Pathian malsawmna zarah neih tam ém èm kan nei lo a nih pawhin lehkha zir thei, ziak leh chhiar thiam leh kan duh ang infiamna te bei theiin kan awm pawh ka ring, a tam zawk hi chu. Hna sâng ém èm lèm lo te pawh thawkin hunawl tha tak, kan duh duh tihna hun kan neih ka ring bawk, thenkhat te chu. Kristian thalaite hian eng tin nge kan nitin nunah hian kan thil hmachhawn te hi kan beih thin tih hi inzawh thar a tulin ka hria. Pathian nung ringtu kan niha kan vanneihna hi kan hriain kan hmangtangkai em aw? Kan nau (Hyderabad) ringlotute chuan an hmaa hlawhtlinna awm chu an thil tui ber infiamna hmangin an hmachhawna, zirna rûn belh theih loh leh eitur tha pawh neih lohna chuan a ti hnufual lo a, ram pum huap inelnaah lawmman la phakin an awm ta hial rèng a ni.
Chuti ang a nih si chuan, ringtute phei hi chu, hmanrua tha tak leh ralthuam famkim nei kan ni si a, kan va ropui leh zual dawn em tih hi kan ngaihtuah ngai em le. Hlimna leh hlawhtlinna te hi kan siam chawp fo thin mai a ni a, nunkhaw nawmna hi kan duan theih a ni châwk; hlawhtlinna te hi kan thawhrah vang liau liaua neih mai theih a ni fo a sin. Kan naute ka han sawi tak pawh khan hrehawm takin hun hmang mah se nun hlimna an nei a, an hmaa lawmman awm chu an hmuhin nasa takin an tang a, an beiseina chuan an hrehawmna chu a khuh bo a ni ber mai awm e. Keini hian theihtawp chhuahin kan bei ve tawh em le? Mipui tam tak min beitute vânga hlau lo leh zâm lo turin kan Pathian chuan min chah si a; indona chu kan indona a ni lo a, Pathian indona a ni zawk si tih Pathianin a zawlneite kaltlangin Israel fate hnena a lo puan (II Chron 20:15) ang khan kan nitin nuna indona kan hmachhawn te hi Krista zara Pathian indona a ni si.
Zirna lama mi chak lo leh infiamna leh thiamthil dang tui nei lo pawh kan ni thei, tui nei ve sei mahse mahni insitna vanga mipui hmaa inpho chhuak ngam lo te pawh kan ni mai thei e. Engpawh ni se, suala piang chuan sual a hneh theih loh vagnin min chhandam turin kan tan Krista Isua chu a rawn thi ta ang khan, mahni inrintâwklohna leh kan âtna te hi mahni maia sutkian a har vangin puitu tha tak kan neih hi kan bèl ngam tur a ni. Kan Pathianin rinnaa nung tura min beiseina hi huai takin kan tihlawhtling tur a ni dawn lo’m ni le! Antam chi fangkhat ang rinna kan neih chuan, tlang lianpui pui hnenah pawh, ‘Heta tangin sawtah sawn va insawn rawh,’ kan tiha insawn mai thei niin min hrilh a; kan tan tih theih loh reng engmawh a awm lo ang (Matt 17:20), tih thutiam kan Lal Isuain min pe tlat mai. Chu rinna neih tum kawngah chuan engmah hloh tur a awm lo e, cheng khat te mah a bo dawn lo, vawikhat chiah rinna nen tawengtaiin kan thil dil chu hmu tawh reng anga ngaiin Pathian nung hi i han cho chhuak chhin teh ang u hmiang. “Nangni mi sual mahin in fate thil tha pek nachang in hriat chuan, in Pa vana mi chuan a diltute chu thil tha a pe zawk em em dawn lo em ni?” tiin kan Lal Isua ngeiin min hrilh kha maw (Matt 7:11).
Zirna lama kan tihthat thin lohna chhan te pawh kan hrisel loh vang te, rilru chak loh vang te leh zirdan kalhmang kan thiam loh vang te a ni thei e, kan thatchhiat vang te pawh a ni thei. Infiamna lama Pathain nung ring ve lote aia kan thlen san theih lohna chhan te pawh kan taihmak loh vang leh hun a inher rem theih loh vang te pawh a ni ang. A engapawh chu ni se, kan Pathian hian tuipui sen zau tak mai chu mihring mithmuh ngeiah hmanraw tul hmangin a sat chat theih a ni tih hi chiang ila, kan harsatna engawh hi, kan rin ngam phawt chaun min sutkian sak mai thei a ni, tih hi hre tharin i han bei teh ang u. Pathian mi hriat Lal Davida ngeiin “LALPA tihna chu finna bul a ni a; chuti anga ti apiangte chuan hriat thiamna tha an nei (Sam 111:10),” a lo tih bawk kha. Amaherawhchu keimahniah hian tumna hi awm hmasa se, malsawm tlaka nung turin ke i pên ang u. “Chungleng savate hi en rawh u; buh an tuh lo a, an ât hek lo, buh inah an seng lut hek lo; nimahsela in Pa vana mi chuan a chawm si a. Nangni chu anni ai chuan nasa takin in hlu zawk lo em ni? (Matt 6:26)” tia kan hlutzia leh mal min sawm châk zia sawitu Krista kan neih hi.
Kan naute ka’n sawi tawh tak pawh khan rinna an nunpui ve mauh mai, chu rinna an nghahna ber chu an tumruhna kha a ni deuh mai. Keini chuan chumi piah lama puitheitu Pathian kan neih hi i hrechhuak thin hram ang u hmiang. Hei mai a la ni lo, hnehna chu Lalpa ta a ni, a tih kha maw Pathian lehkhabu thianghlim chuan! Pathian hrin tawh phawt chuan khawvel a ngam zel si a; hei hi a ni, khawvel hneha ngamna chu, kan rinna hi (I Johan 5:4). Damlohna leh natna te hian min tih lungngaih chuan rinnaa Pathian kan neih hian min chhâwk rawh se. Ani chuan kan natnate phurin, kan lungngaihnate pawh a phur si; kan bawhchhiatnate avângin hliamin a awm a, kan khawlohnate avângin vuak thitlinin a awm a: kan thlamuanna tûr thununna chu a chungah a tla a; a vuakna vualtea tihdamin kan awm ta (IS 53:4-5). A ni! Tihdamin kan awm tawh kan rin phawt chuan. Kan natna tamtak te hi thihna tur a ni lo a, Pathian mawina leh a thiltihtheihna lan chhuahna tur zawk a ni fo (Johana 11:4).
Vawiinah hian kan thil tih thin reng a lo nih lèm loh chuan Bible chhiar hi uar thar ila a va duhawm èm. Thuthlung thar atanga tanin, Sâm leh Thufingte nen hian nitin chhiar tum ila a tha ang. Bible te chumobile-ah te pawh a dah theih tawh a lawm le. Inbiak khàtna leh rei tak inhmuhlohna te hian inngainatna leh inpawhlohna te a thlen duh si. Hnehna leh hlawhtlinna thuruk min hlan theitu kan neih that ber Pathian nen hian kan inkar a hlata a khîk lohna’n A thute ngaihtuahin i be (tawngtai) fo thin ang u. Eng nge holh tur awm? Eng nge chàn tur awm? A sáwt tak loh leh ngai awh… Mahse ngai kan awh lo tlangpui ang tih hi hre turin i ti chhin fo ang u. Nghet takin, tihchet rual lohin Lalpa hna thahnemngai taka thawk foin i awm ang u, kan thawhrimna chu Lalpaah chuan a thlawn ngai lo a ni tih kan Bible ngeiin min hrilh kha (I Kor 15:58). Hnehna chu Lalapa zara kan ta a ni si a; kan Lalpa Isua Krista zara hnehna min petu Pathian hnenah chuan lawmthu awm rawh se (I Kor 15:57).
[He article hi Aizawl Bungkawn KTP weekly newspaper - Ebenezer, 25th Sept 2011 Issue-a tihchhuah a ni.]
No comments:
Post a Comment